User:Arne List/fo-news-071011

Definition from Wiktionary, the free dictionary
Jump to: navigation, search

Boripallur á veg í føroyskan sjógv[edit]

Mynd: Soleiðis ímyndar teknarin Óli Petersen sær jólakortini í ár, um so er, at BP rakar við.

Komandi dagarnar verður riggað til at bora Williambrunnin á landgrunninum. Sett verður á í vikuskiftinum ella fyrst í komandi viku.

Eftir at hava borað fyri Chevron beint hinumegin markið í skjótt eitt ár, er pallurin á veg til Williamleiðina, har suðuri á landgrunninum at bora tann sætta brunnin á Føroyaøkinum, síðani farið varð undir at leita eftir olju fyri skjótt sjey árum síðani.

Hjarnar Djurhuus, stjóri hjá BP í Føroyum sigur, at teir eru við at fáa tað seinasta uppá pláss, nú borurin skal setast í undirgrundina ein av komandi døgunum. Alt veldst um veðrið, nær klárt er at seta á. Pallurin er av slagnum, sum skal festast í botn við akkerum. Hetta arbeiði skal helst gerast í hampuliga góðum veðri. Sum er er umskiftandi veður, men líkindini tykjast kortini góð. Møguliga verður sett á í vikuskiftinum ella fyrst í komandi viku.

Williambrunnurin er eitt samstarv millum tvey av heimsins størstu oljufeløgum, BP og Shell. Haraftrat er stóra amerikanska oljufelagið Anadarko eisini við. Upprunaliga skuldu BP og Shell bora tríggjar brunnar á landgrunninum. tey høvdu borað ein brunn mettu feløgini, at tað var skeivt at bora hinar báðar brunnarnar í tí sama loyvisøkinum. Ístaðin tóku tey upp samráðingar við myndugleikarnar um at bora ein meira kostnaðarmiklan brunn inni á basaltinum. Avtala var gjørd við Anadarko at bora henda brunnin á tess loyvi. Hjarnar Djurhuus segði við sjónvarpið í vikuni, at talan verður helst um at bora ígjøgnum einar 500 metrar av basalti ella meira. Hetta er áhugavert, tí nógva staðni á landgrunninum er basaltið nógv tjúkri.