User:Aearthrise/RomanceLanguage/Creole Stories

Longtemps longtemps dans pays Louisiane, y'avait un roi qui té gagner un grand bassin. Là-bas même li té baigner son corps tous les matins, à cause docteur té commander li. Avlà un jour li arriver dans bord bassin; del'eau sale, li ne pas capable baigner. Roi là appelle gardien pour bourrer li. Lendemain, del'eau sale. Troisième jour, del'eau sale. Roi pèser gardien dans cou, li secouer li, li dire li:

-Eh! toi, toi voulais que moi attraper gale dans ça del'eau là? Si demain bassin ne pas propre, toi va guetter si moi pas ronfler toi!

Gardien gagner peur. À soir li prendre fusil, li caché dans feuilles de songe eux bord bassin; nuitte là té noir, et lune té pas dehors. L'heure canon tiré, li entendre un monde après venir, li écouter: tac, tac, tac; ça té un lièvre! Avant gardien té gagner temps pour lever fusil, lièvre venu droit à li, li dire li:

-Bonjour, bonjour, gardien! Comme moi content trouver vous! longtemps même moi rôdé, à cause moi gagner quéque chose de bon pour donner vous. Goûter ça dumiel mon famille dans Trois Islots sorti envoyer moi! vous va dire moi si vous jamais té trouver dumiel comme ça.

Gardien prendre calebasse, li avaler un gorgée.