User:Mårtensås/Hildebrandslied/orig
Ik gihorta daz seggen
daz sih urhezzun ænon muozin •
hiltibrant enti hadubrant untar heriun zuem •
sunufatarungo • iro saro rihtun •
garutun se iro gudhamun • gurtun sih • iro • suert ana •
helidos ubar ringa do sie zo dero hiltu ritun •
hiltibrant gimahalta • her uuas heroro man
ferahes frotoro • her fragen gistuont
fohem uuortum • uuer sin fater uuari
fireo in folche •
eddo uuelihhes cnuosles du sis •
ibu du mi enan sages ik mi de odre uuet
chind in chunincriche • chud ist min al irmindeot •
hadubrant gimahalta hiltibrantes sunu •
daz sagetun mi usere liuti
alte anti frote dea erhina uuarun •
daz hiltibrant hæzzi min fater • ih heizzu hadubrant •
forn her ostar gihueiz floh her otachres nid
hina miti theotrihhe enti sinero degano filu •
her fur laez in lante luzzila sizzen
prut in bure barn unuuahsan
arbeo laosa • her raet ostar hina
des sid detrihhe darba gistuontum
fateres mines • daz uuas so friuntlaos man
her uuas otachre ummez zirri
degano dechisto unti deotrichhe
her uuas eo folches at ente imo uuas eo peheta zi leop •
chud uuas her • chonnem mannum
ni uuaniu ih iu lib habbe •
uuezzu irmingot quad hiltibrant obana ab heuane
dat du neo dana halt mit sus sippan man
dinc ni gileitos •
uuant her do ar arme uuuntane bauga
cheisuringu gitan • so imo se der chuning gap
huneo truhtin • dat ih dir it nu bi huldi gibu •
hadubrant gimahalta hiltibrantes sunu •
mit geru scal man geba infahan
ort uuidar orte •
du bist dir alter hun ummet spaher
spenis mih mit dinem uuortun uuili mih dinu speru uuerpan •
pist also gialtet man so du euuin inuuit fortos •
dat sagetun mi seolidante
uuestar ubar uuentilseo daz inan uuic furnam •
tot ist hiltibrant heribrantes suno •
hiltibrant gimahalta heribrantes suno •
uuela gisihu ih in dinem hrustim
dat du habes heme herron goten
dat du noh bi desemo riche reccheo ni uuurti •
uuelaga nu uualtant got quad hiltibrant uueuuurt skihit •
ih uuallota sumaro enti uuintro sehstic ur lante •
dar man mih eo scerita in folc sceotantero
so man mir at burc enigeru • banun ni gifasta •
nu scal mih suasaz chind • suertu hauuuan
breton mit sinu billiu eddo ih imo zi banin uuerdan •
doh maht du nu aodlihho ibu dir din ellen taoc •
in sus heremo man hrusti giuuinnan
rauba bihrahanen • ibu du dar enic reht habes •
der si doh nu argosto quad hiltibrant ostar liuto
der dir nu uuiges uuarne nu dih es so uuel lustit •
gudea gimeinun niuse de mozzi •
uueddar sih hiutu dero hregilo rumen muozzi •
efdo desero brunnono bedero uualtan •
do lezzun se ærist asckim scritan
scarpen scurim daz in dem sciltim stont •
do stoptun zo samane staim bort chludun •
heuuun harmlicco huizze scilti •
unti imo iro lintun luzzilo uuurtun •
giuuigan miti uuabnum