User talk:Stephen G. Brown/text1

Definition from Wiktionary, the free dictionary
Jump to navigation Jump to search

Hózhǫ́ǫgo naasháa doo
Shitsijįʼ hózhǫ́ǫgo naasháa doo
Shikéédę́ę́ʼ hózhǫ́ǫgo naasháa doo
Shideiigi hózhǫ́ǫgo naasháa doo
Tʼáá ałtso shinaagóó hózhǫ́ǫgo naasháa doo
Hózhǫ́ náhásdlį́į́ʼ
Hózhǫ́ náhásdlį́į́ʼ
Hózhǫ́ náhásdlį́į́ʼ
Hózhǫ́ náhásdlį́į́ʼ

Hataaʼ Baazhníʼáázh Bahaneʼ

Ałkʼidą́ą́ʼ, tʼahdii naayééʼ dahólǫ́ǫ́ yę́ędą́ą́ʼ, Asdzą́ą́ Nádleehé ashiiké naakií yishchį́. Áko Yéʼiitsoh éí Asdzą́ą́ Nádleehé yiłtsą́ągo yíyííłtsą́, biniinaa áłahjįʼ áadi nádááh jiní. Yéʼiitsoh doo ákweʼé naagháagóó shį́į́, Asdzą́ą́ Nádleehé beʼawééʼ yishchį́. Awééʼ naaki ashiiké éí níléí honikʼeh biyaa góyaa ahoogeedgo ákóneʼé nídeideesʼį́į́ʼ. Yéʼiitsoh shį́į́ náánádzą́ągo, Asdzą́ą́ Nádleehé doo yiltsą́ą́góó yíyííłtsą.

Yéʼiitsoh shį́į́ ání, “Háájį́ awééʼ?”

“Awééʼ doo nihee hólǫ́ǫ da,” shį́į́ dabijiní.

Yéʼiitsoh shį́į́ oosdląąd jiní. Ashiiké Naakií shį́į́ tʼáadoo hodinaʼí noosééł jiní. Tʼáadoo hodinaʼí náníkeeh silį́į́ʼ dóó nikidiinaʼ jiní. Áádóó tʼáadoo hodinaʼí nikidiiʼáázh jiní. Wónáásdóó, tłʼóóʼgóó chʼínáhiʼnilchééh jiní. Ákótʼéego shį́į́ Yéʼiitsoh áłchíní nabikéeʼgo yíyííłtsą́.

“Shą́ą́ʼ, áłchíní doo hólǫ́ǫ da dadohní” ni jiní Yéʼiitsoh. “Kǫ́ǫ́ áłchíní nabikééʼígíí shąʼ háájį́?” níigo nahódíłkid jiní. “Háadi shąʼ nidahodoołʼį́į́ʼ?” ní jiní.

“Áłchíní nihee ádaadin,” nádabizhdiʼní jiní. Átsé Asdzą́ą́ shį́į́ ání “Áłchíní bídįh daniidlį́įgo biniinaa, kótʼéego áłchíní nidabikééʼ ánídeiilʼįįh.” Átsé Asdzą́ą́ shį́į́ bílaʼ yineeshjoł dóó łeezh yiyiʼ áłchíní nabikééʼ nahalingo áyiilaa jiní.

Yéʼiitsoh háágóshį́į́ áajįʼ déezʼį́į́ʼ jiní. “Shoo yaʼ, tʼáá łaʼ ánii ałchíní nábikééʼ nahalin,” níigo áajįʼ déezʼį́į́ʼ jiní.

Haashchʼééłtiʼį bicheii éí ashiiké neinitin jiní. Ashiiké dighánááhiʼ dínílchééh dóó ádiltłʼisgo shį́į́ bee naʼbidinítingo noosééł jiní. Tséłké silį́įʼgo ayóo kʼaaʼ dóó ałtį́į́ʼ yee naalzheeh jiní. Tʼah abínídą́ą́ʼ naalzheeh yiniiyé dah diiʼash. Hííłchʼįįhgo nátʼashgo, gah da dóó bįįh da ádaatʼéii niiyééh dóó bimá dóó bimásání yaa yiyééh jiní.

Yéʼiitsoh dóó anaaʼí shį́į́ diné nideiłtseedgo baa tsístłʼahasdeeʼ jiní. Áko shį́į́ ashiiké ání jiní “Yéʼiitsoh dóó anaaʼí ałtso nidiiłtsił, nihidineʼé ałtso deiʼniildéél.”

“Haash yitʼéego nidoołtsił?” shį́į́ dabijiní.

“Éí yeeʼ doo baa honitʼiʼ da,” dabijiní. Áádóó shį́į́ bizhéʼé yinaʼídíłkid jiní. “Háíshąʼ nihizhéʼé?” níigo naʼídíłkid, jiní.

Asdzą́ą́ Nádleehé shį́į́ éí tʼóó, “Hóla,” nídíʼniih jiní. Dį́įdi náʼásdlį́įʼgo índa shį́į́ bił hojoolneʼ jiní.

“Nihizhéʼé bichʼįʼ nízaad dóó bichʼįʼ hóyééʼ,” shį́į́ bijiní. “Jóhanaaʼéí éí nihitaaʼ átʼé,” bijiníigo bił hojoolneʼ.

“Nihizhéʼé bichʼįʼ diitʼash,” níigo ashiiké yaa nitsininááʼníłdéél jiní.

Asdzą́ą́ Nádleehé shį́į́ baʼáłchíní chʼééh dooda yiłníigo, wónáásdóó shį́į́ tʼóó ashiiké yichʼįʼ lą́ asłį́į́ʼ.

Ashiiké shį́į́ éí, “Kʼad nihizhéʼé bichʼįʼ diitʼash,” níigo hashtʼeʼádilyaa dóó baghan Chʼóolʼį́ʼídóó dah diiʼáázh jiní.

nááná...

Haghandóó dashdiiʼaashgo shį́į́, éí níłchʼi dóó hinááh bitsʼos bił dashdiikai jiní. Éí shį́į́ łahdóó haʼáhályą́ą́góó bił jookah jiní. Ashiiké bizhéʼé yichʼįʼ yiʼashgo diné łaʼ bidááh heeskai. Yiʼash nítʼééʼ hastiin sáanii léiʼ hadááh níyá jiní. Nítʼééʼ Wóseekʼidii hadááh níyáá lą́ jiní.

“Háádę́ę́ʼ lą́ wohʼash, Shitsóí? Nihokááʼ Dineʼé doo kǫ́ǫ́ naagháa da,” hałní jiní.

“Díí yeeʼ nihitaaʼ bichʼįʼ diitʼáázh,” bí jiní.

“Nihitaaʼ yeeʼ doo tsʼíí átʼée da,” hałní jiní. “Bichʼįʼ hóyééʼ,” nááháłní jiní. Áádóó tsiighájíłchį́ yideeskwii dóó haa níłjool jiní.

“Nihizhéʼé éí nátʼoh yee nihidooghą́ą́ł, biniiyé łaʼ nihee doojih. Ákódzaa éí díí ázadoohjih,” hałní jiní. Tsiighájíłchį́ yę́ę hajaatʼahgi bíjíshjah dóó dah náázhdiitʼáázh jiní.

Náájootʼash nítʼééʼ asdzą́ą́ sání léiʼ hadááh náánádzą́ jiní. Są́ hadááh náánádzą́ą́ lą́ jiní. Ńtʼééʼ ánááhodiʼní jiní, “Nihokááʼ Dineʼé doo kǫ́ǫ́ naagháa da. Háádę́ę́ʼísh wohʼash?” níigo náhódíłkid jiní.

“Nihí éí nihitaaʼ bichʼįʼ diitʼáázh,” bijiní.

“Nihitaaʼ yeeʼ Doo Joobaʼii óolyé,” nááhodiʼní. Áádóó áháłní, “Níléidi atiin łaʼ nishnáájígo dahadiitiin. Łaʼ éí nishtłʼahjigo dahadiitiin. Nishtłʼahjigo dahadiitiinígíí dah doohʼash lágo. Áájígo dooda.”

Hágóshį́į́ bijiníigo dah náázhdiitʼáázh. Níléidi ałtsʼáʼáztiin yę́ędi jiníʼáázh. Dooda hodooʼniid yę́ę góneʼ dazhdiiʼáázh jiní. Doo átʼéhígóó jooʼash.

“Háʼátʼíí lá biniiyé dooda nihiłní lą́?” jiníigo jooʼash jiní.

Hodíinaʼgo ánaaí jilínígíí nátʼą́ą́ʼ nízhdéétʼį́į́ʼ. Nítʼééʼ hatsílį́ bitsiiʼ bijaatʼahdóó łibáago hakééʼ yigááł jiní. Tʼáá náás jooʼashgo nááhodooʼnaago nátʼą́ą́ʼ nínázhdéétʼį́į́ʼ. Ńtʼééʼ hatsílį́ biniiʼ sá, silį́į́ʼ lą́ jiní. Haashį́į́ nízahjįʼ nináájitʼáazhgo tʼą́ą́ʼ nínáázhdéétʼį́į́ʼ. Nítʼééʼ hatsílį́ nízaadę́ę́ʼ hakééʼ yigááł jiní. Tʼáá náás jooʼashgo nááhodooʼnaago nátʼą́ą́ʼ nínáázhdéétʼį́į́ʼ. Nítʼééʼ hatsílį́ tsʼídá ałtso bitsiiʼ yiigai dóó bigish hazlį́į́ʼ léiʼ yigááł jiní.

“Díí biniinaa dooda nihiłní lą́,” jiníigo naanijíshtʼáázh jiní.

Nátʼą́ą́ʼ níjootʼashgo ániid nijiʼaash níjoodleełgo níléijįʼchʼééjítʼáázh jiní. Atiin ałtsʼą́ąjigo dahadiitiin yę́ędi chʼééjítʼáázh dóó kojigo hodooʼniid yę́ę góneʼ dazhdiiʼáázh jiní. Éí shį́į́ biniinaa dííshjį́įdi bił hajííʼáázh hakéédę́ę́ʼ naagháhígíí áłtsé bitsiiʼ yiigah jiní.

Áádóó shį́į́ diné łaʼ hadááh nááhaaskai jiní. Áko tʼáá hadááh hakááhígíí éí hazhéʼé doo joobaʼ da dahałníigo hoł dahałneʼ jiní. Áádóó tʼáadooleʼé haa dayiinííł dóó hoł dahałneʼ.

“Níléidi nizhéʼé kódzaago kódoohnííl, hoʼdiʼníigo jooʼaash jiní.”

nááná...

Ashiiké éí tsʼídá ałníʼníʼą́ągo níléí Jóhonaaʼéí bighandí níʼáázh jiní. Ńtʼééʼ Jóhonaaʼéí beʼesdzą́ą́ sidáá lą́. Áadi yah hajííʼáázh.

Ńtʼééʼ asdzą́ą́ áháłní jiní “Nihokááʼ Dineʼé doo kǫ́ǫ́ naagháa da. Háádę́ę́ʼshąʼ wohʼash?”

“Nihitaaʼ baa niitʼáázh,” bijiní.

Ńtʼééʼ asdzą́ą́ doo bił hałdin da jiní. Áádóó áháłní jiní, “Iʼííʼą́ągo nináhádááh. Kʼadę́ę shį́į́ náádááł.”

Áádóó náhodeesʼį́į́ʼ jiní. Kʼos łigai dóó kʼos łitso dóó kʼos dootłizh dóó kʼos diłhił, hoł yizdis dóó náhodeesʼį́į́ʼ jiní. Hodíinaʼ ńtʼééʼ tłʼóóʼdę́ę́ʼ hodiistsʼą́ą́ʼ jiní. Jóhonaaʼéí nádzą́. Jóhonaaʼéí éí yah ííyá dóó nahgóó naazghal.

Tʼáá áko ání jiní, “Ałníníʼą́ą́dą́ą́ʼ kojįʼ iʼiijį́įniʼ. Háájí lą́ ajííʼáázh?”

“Shą́ąʼ doo áshtʼínígóó ałnánáshdááh diní?” níigo asdzą́ą́ łeʼ niizį́į́ʼ jiní.

Jóhonaaʼéí éí háágóshį́į́ bighan góneʼ naanánootááł jiní. Hodíinaʼ ńtʼééʼ haʼaʼaahjigo, kʼos diłhił aadę́ę́ʼ ayíiłtsooz dóó náyoozʼą ńtʼééʼ ashiiké haníídeeʼ jiní.

“Nihokááʼ Dineʼé doo kǫ́ǫ́ naagháa da,” ní jiní Jóhonaaʼéí. “Háádę́ę́ʼshąʼ wohʼash?” nááhodiʼní jiní.

“Chʼóolʼį́ʼį́dę́ę́ʼ neitʼaash dóó Yoołgai Asdzą́ą́ nihimá,” ní jiní.

“Haʼátʼíísh biniiyé nooʼáázh?”

Yéʼiitsoh dóó naayééʼ diné ałtso nideeʼniiłtseed yaa hoolneʼ. “Éí naayééʼ ałtso nidiiltsił biniiyé niitʼáázh.” Atsiniltłʼish kʼaaʼ haʼaʼaahjigo dah sinil, éí yichʼįʼ dah diilniiʼ dóó “Níléí há niitʼáázh,” jiní.

Jóhonaaʼéí éí dooda hałní jiní. Áádóó Jóhonaaʼéí éí táchééh niidiníłjééʼ dóó táchééh hóonil jiní. Chahałheeł hadéídiníłbaal dóó tłʼóóʼdę́ę́ʼ áháłní jiní, “Daʼ honiidoiísh?” Dį́įdi ákónáhodooʼniid jiní.

Áko ńtʼééʼ táchééh góneʼ jineezkéé ńtʼééʼ, Chʼął tʼah nítʼééʼ łeeyíʼdę́ę́ʼ tsé nahjįʼ ayííʼą́ jiní. “Hágo, shitsóí. Wóshdę́ę́ʼ kóneʼ oohʼaash,” hałní jiní. “Nihizhéʼé doo tsʼíí átʼée da. Nanihiʼniiłtseedgo átʼį́,” hałní jiní.

Hahoogeed góneʼ ajííʼáázh dóó tsé hadéídiníʼą́ jiní. Hodíinaʼ ńtʼééʼ hágoshį́į́ íitsʼaʼ jiní. Éí shį́į́ béésh sistʼogii daniidoigo ałná háádaalwo jiní. Hakáaʼdi tsʼiziil, tsʼiziil yiitsʼaʼ jiní. Doo íitsʼaʼgóó tsé nahjįʼ ajííʼą́.

Jóhonaaʼéí dáádiníbaal nahjįʼ ayííłtsooz nítʼééʼ doo ajítʼéhígóó jizké. “Tįʼ,” hałníigo bighangóó bikééʼ níjítʼáázh.

Bighan góneʼ éí nátʼoh há hashtʼéyiilaa. Niłchʼi éí tsiighájíłchį́ ázaołchǫǫł hałníigo éí ákojiilaa. Jóhonaaʼéí binátʼoh ałtso ńjistʼoh. Doo ájítʼéhígóó jizké. Jóhonaaʼéí éí áko oosdląąd. “Tʼááʼaaníí shaʼáłchíní nohłį́į́ lá,” hałní jiní áadi.

Baʼáłchíní chʼikę́ę́h naaki lą́ jiní. Atʼééké éí leesʼáán áyiilaa dóó bilah hazkʼą́ą́z jiní. Ńtʼééʼ bikéédóó áháłní jiní “Dooládóʼ shilah bitsʼádiʼnídíin da.” Ákweʼé shį́į́ halah bił ahaa dloh hodichííh hazlį́į́ʼ jiní.

nááná...

Jóhoonaaʼéí ałtso ashiiké haidiilaa. Jóhoonaaʼéí éí ashiiké dáádílkał shádíʼáahjigo yá ąąʼ áyiilaa ńtʼééʼ łį́į́ʼ ałtaasʼéí eelʼá jiní.

“Díí daatsʼį́ biniiyé nooʼáázh?” ní jiní Jóhonaaʼéí.

“Éí doo biniiyé niitʼáazh da,” bí jiní.

Áádóó eʼeʼaahjigo dáádílkał yá ąąʼ áyiilaa ńtʼééʼ dibé ałtaasʼéí adaasʼą́ jiní. “Díí daatsʼį́ há nooʼáázh?” ní jiní Jóhonaaʼéí.

“Éí doo há niitʼáazh da,” bí jiní.

Náhookǫsjigo éí yódí ałtaasʼéí hólǫ́ǫ́ lá jiní. “Éí tʼáá ałtso doo biniiyé niitʼáazh da,” bí jiní.

“Áko lą́ haʼátʼíí biniiyé nooʼáázh?” ní jiní Jóhonaaʼéí.

Haʼaʼaajigo atsiniltłʼish kʼąąʼ dah sinil nítʼééʼ, “Éí biká niitʼáázh,” ní jiní.

“Doo daanéʼé átʼée da,” shį́į́ biʼdooʼniid.

Tʼáá ákótʼée ndi dį́įdi atsiniltłʼish kʼąąʼ yiyííkeed. Jóhonaaʼéí tʼóó yaa átʼéego hodíinaʼ jiní. Tʼáá hojoobaʼígo Jóhonaaʼéí lą́ asłį́į́ʼ jiní.

“Yéʼiitsoh dóó anaaʼí éí tʼáá ałtso shaʼáłchíní ádaatʼé,” hałní jiní. Ałníʼníʼą́ągo yá ałníiʼjįʼ náátsʼíilid yee hoł niikai jiní.

“Noołchʼííł. Tʼáadoo dínóhʼį́ʼí,” hałníigo jiniilchʼiil jiní.

Ałníiʼgi daatsʼí átʼé atsilí jilínígíí jidééʼį́į́ʼ, nítʼééʼ ádah jindínéizdeeʼ jiní. Háágóshį́į́ Jóhonaaʼéí hachʼáhóóshkeed jiní. Názhniilchʼiil dóó yá ałníiʼjįʼ níjíkai jiní.

“Háadi lą́ nihighan?” hałní jiní.

“Ńléidi Chʼóolʼį́ʼį́dę́ę́ʼ neitʼaash,” bí jiní.

“Díí atsiniltłʼish doo daanéʼé átʼée da,” hałní jiní. “Díí tsʼídá biniiyé yínóokeedígíí tʼéiyá biniiyé choidoołʼįįł,” hałní jiní. Áádóó bichʼįʼ lą́ ajisłį́į́ʼ jiní.

Dį́įdi adeeshchʼiłgo, níléí niʼjįʼ hoł adááʼdoolchʼil jiní. Tʼah nítʼééʼ tʼáá nízaadi haʼátʼííshį́į́ léiʼ dah łizhin jiní. Tʼáá áko kodóó jizkah, nítʼééʼ ayóó íístsʼą́ą́ʼ dóó łeezh hááyá jiní. Áadi ahizhneelchą́ą́ʼ ńtʼééʼ Naʼashǫ́ʼii Dichʼízhii átʼį́į́ lą́ jiní. Háágóshį́į́ hachʼahóóshkeed jiní.

Níléí Tsoodził bíighahdi Tó Sidó hoolyé. Áadi Yéʼiitsoh tó siyį́ tsʼídá ałtso néídlį́į́h jiní. Ákótʼéego shį́į́ yiniiyé tó síyínídi náánádzą́ ńtʼééʼ níléí tó yiyiʼ hoołtsą́ jiní.

Ńtʼééʼ ání jiní “Dooládóʼ haʼátʼííshį́į́ nizhóní léiʼ yiiłtsą́.” Áádóó tó tsʼídá ałtso yoodlą́ą́ʼ jiní. Áádóó níléídę́ę́ʼ Jóhonaaʼéí atsiniltłʼish Yéʼiitsoh yee yiskah. Áyóóʼ íistsʼą́ą́ʼ jiní. Yéʼiitsoh béésh sistʼogii yee hadítʼéé ńtʼééʼ bąąh nááłdááz jiní. Éí ałtso nihokááʼ nikiiłdááz. Atsilí nilínígíí kodóó éí tsihał łigai dóó dootłʼizh dóó tsihał łitso dóó tsihał łizhin Yéʼiitsoh yee yíínííłhaal jiní. Yéʼiitsoh yę́ę bił chʼąą hazlį́į́ʼ jiní. Áádóó ánaaí atsiniltłʼish kʼaaʼ Yéʼiitsoh bijéí góneʼ yee yiskah. Yéʼiitsoh naʼíígoʼ.

Bidił deezgoʼ dóó níléí dził bichʼįʼ yinahgo Níłchʼi áháłní jiní “Bidił bichʼą́ą́h oohsoh. Yéʼiitsoh bidił dził bidiinaʼgo éí náádidoolwoł.”

Tʼáá áko dił bichʼą́ą́h adzizoh jiní. Áajįʼ Yéʼiitsoh jiisxį́.

Tsé Nináhálééh Biʼáád náhodiiłtį́ dóó biyázhí siké góyaa adahółtʼeʼ. Niʼjįʼ nikizhnítłizhgo achʼį́į́ʼ biyiʼgo hazénáztʼįʼ ńtʼééʼ, biníkázhníłgizhgo dił háánaʼ. Áko Tsé Nináhálééh biyázhí hachʼįʼ dah hidíníilchʼą́ą́ʼ, ńtʼééʼ “shiid” bijiní jiní.

“Shimá díí ‘shiid’ nihiłní,” ní jiní.

“Tʼáadoo ádóhníní, tʼóó bikʼehgo ádaaní,” ní jiní bimá.

Áádóó Tsé Nináhálééh biyázhí bizhéʼé bínabízhdíłkid, nítʼééʼ ání jiní, “Nihizhéʼé éí aakʼeego nináhádááh níłtsą́ bikąʼ diłtį́įgo. Kʼadę́ę shį́į́ náádááł,” hałní jiní. Tsé Nináhálééh Biʼáád jiisxį́.

Hodíinaʼ ńtʼééʼ bizhéʼé náátʼaʼ jiní. Éí ałdóʼ náájiisxį́ jiní. Tsé Nináhálééh biyázhí éí yichago siké jiní.

“Tʼáadoo wochaaí,” bijiníigo, ałtsʼą́ąjigo dashdiiłʼaʼ jiní. Łaʼ éí “Hoolʼáágóó diné chodanoołʼį́į dooleeł,” bijiní. Áádóó łaʼ éí, “Hoolʼáágóó diné haneʼbił naniʼáa dooleeł,” bijiníigo tʼáá áłah dashdiiłʼaʼ jiní.

Átséhígíí éí atsá silį́į́ʼ dóó akéédę́ę́ʼígíí éí néʼéshjaaʼ silį́į́ʼ jiní. Bikééʼdóó Déélgééd baa náájítʼáázh jiní. Déélgééd éí halgaigo sitį́įgo diné titiiltséehgo yichʼįʼ náhidiilyeedgo bideeʼ yee neiłtseed jiní.

“Haalá yítʼéego diyiilyééł?” jiníigo chʼééh biníjootʼash.

Hazeistsʼósii haa yílwodgo bił hojilneʼ nítʼééʼ ání jiní, “Éí shí haa náshdááh.” Áádóó Hazéistsʼósii éí łeeh íígeed dóó dį́įgo ałkʼi ałką́ąʼgo naʼazgeed jiní. Níléí Déélgééd sitį́nę́ęjįʼ anígeed. Tsʼídá bijéí dah náʼatʼihíjįʼ iʼíígeed jiní. Áádę́ę́ʼ hanáswod. Tʼáá ákóyaa ahizhnoołchą́ą́ʼ dóó níléí Déélgééd baa hizhneelchą́ą́ʼ. Áadi tʼáá áłháníjįʼ bijéí góneʼ jiskah. Déélgééd yę́ę náhidiitah dóó bideeʼ yee átsé hoogeed yę́ę haidiiłdláád. Áádóó naaki góneʼ dóó tááʼ góneʼ ałtso haidiiłdláád. Dį́į́ʼ góneʼígíí éí ałnį́įʼjįʼ haidiiłdláád dóó naaʼíígoʼ dóó daaztsą́.

Tʼah ńtʼééʼ áadi hazéistsʼósii Déélgééd yikááʼ haaswod léiʼ yikááʼ dah naʼalzhiish jiní. Áajįʼ Déélgééd náájiisxį́ jiní. Ákóneʼ éí Tsé Dahódzííłtáłii baa náájítʼáázh jiní.

Tsé Dahódzííłtáłii éí bitsiiʼ tsé bidíníilzheeʼgo bááh adeinitʼingo sitį́ jiní. Áko diné atiingi dajíkáahgo tʼáadoo ádahojilchįįhí, tsé yichxiiʼ góyaa diné adah yídzííłtáałgo diné neiłtseed jiní. Áko díkwíí shį́į́ naayééʼ neistseed jiní.

Áko ndi naayééʼ łaʼ ádaa nídaʼooskan, biniinaa tʼáadoo nidaʼbiʼdistseed da. Dichin dóó Téʼéʼį́ dóó Yaaʼ dóó Diigis éí dííjį́įdi hólǫ́.

Ashiiké Naakií ałtso naayééʼ neistseedgo, bighandi náátʼáázh dóó bąąh dahooʼaʼ jiní. Naayééʼkʼehjí bá ályaago yee bitah yáʼátʼééh násdlį́į́ʼ jiní. Aláajįʼ naagháhígíí éí Naayééʼ Neizghání wolyé dóó atsilí éí Tóbájíshchíní wolyé silį́į́ʼ jiní.