User:Arne List/fo-news-080316

• Source: http://www.sportal.fo/mitt.php?greinar=&les_grein=48190
• Subject: Football friendly Iceland - Faroes 3-0

Ísland vann trygt

• Mynd: Heldur ikki í dag eydnaðist landsliðsvenjaranum og hansara monnum at fáa úrtøku í altjóða dysti.

Føroyar taptu 3-0 í venjingardystinum móti Íslandi í Kópavági í dag. Arnbjørn T. Hansen misnýtti stóra møguleikan at leggja føroyingar á odda og so fekk Ísland lætt spæl.

Aftur í dag mátti føroyska landsliðið leggja rygg til ein ósigur í altjóða høpi. Í venjingardystinum í Kópavági vann Ísland trygt 3-0, eftir hálvleiksstøðuna 1-0.

Íslendingar vóru meira á bóltinum frá byrjan, men ein vælleikandi føroyskur verjupartur syrgdi fyri, at heimaliðið ikki hevði eina veruliga atsókn á málið. Arnbjørn T. Hansen átti størsta føroyska málmøguleikanum í dystinum, tá hann miðskeiðis í fyrra hálvleiki var spældur einsamallur móti málverjanum. Hann var ikki nóg kaldur og sendi beint á Kjartan Sturluson millum stengurnar.

Føroyar trýstu í løtum íslendingar, men vandamiklir vóru gestirnir ongantíð. Beint áðrenn hvíldina legði Jónas Guðni Sævarsson heimaliðið á odda. Miðvallarin var ikki serliga væl ansaður, tá hann við høvdinum stýrdi einum innleggi úr høgru í málið. Ísland skoraði tvær ferðir í seinna umfarinum eisini. Fyrst var Fróði Benjaminsen so mikið óheppin at stýra bóltinum í egi mál, áðrenn Tryggvi Guðmundsson ótarnaður økti til 3-0, tá 10 minuttir restaðu av dystinum.

Rógvi Jacobsen var seinastu løtuna eisini vístur av vølli, tá hann sendi ein íslending harðliga niður í graslíkið.

Tryggur sigur til Ísland, sum bara hevði ein útiseta við á liðnum. Føroyska ferðalagið kemur aftur til Føroya í morgin.