User:Medellia/Atelier/Catullus

Carmen I

Cui dōnō lepidum novum libellum

āridā modo pūmice expolītum?

Cornēlī, tibi: namque tū solēbās

meās esse aliquid putāre nūgās

iam tum cum ausus es ūnus Italōrum

omne aevum tribus explicāre chartīs

dōctīs, Iuppiter, et labōriōsīs!

Quārē habē tibi quidquid hōc libellī

quālecumque; quod, ō pātrōna virgō,

plus ūnō maneat perenne saeclō.

Carmen II

Passer, dēliciae meae puellae

quīcum lūdere, quem in sinū tenēre,

cui prīmum digitum dare adpetentī

et acrīs solet incitāre morsūs,

cum dēsīderiō meō nitentī

cārum nesciō quid libet iocārī

(et sōlāciolum suī dolōris,

crēdō, ut tum gravis adquiescat ardor),

tēcum lūdere sicut ipsa possem

et tristīs animī levāre cūrās!

IIb

Tam grātum est mihi quam ferunt puellae

pernīcī aureolum fuisse mālum,

quod zōnam solvit diū ligātam.