User:Mårtensås/Hildebrandslied/man
![](http://upload.wikimedia.org/wikipedia/commons/thumb/5/59/Hildebrandslied1.jpg/220px-Hildebrandslied1.jpg)
![](http://upload.wikimedia.org/wikipedia/commons/thumb/d/d2/Hildebrandslied2.jpg/220px-Hildebrandslied2.jpg)
Ik gihorta dat seggen
dat sih urhettun ænon muotin •
hiltibrant enti hadubrant untar heriun tuem •
sunufatarungo • iro saro rihtun •
garutun se iro gudhamun • gurtun sih • iro • suert ana •
helidos ubar ringa do sie to dero hiltu ritun •
hiltibrant gimahalta heribrantes sunu • her uuas heroro man
ferahes frotoro • her fragen gistuont
fohem uuortum • ƿer sin fater ƿari
fireo in folche … •
eddo ƿelihhes cnuosles du sis •
ibu du mi enan sages ik mi de odre uuet
chind in chunincriche • chud ist min al irmindeot •
hadubrant gimahalta hiltibrantes sunu •
dat sagetun mi usere liuti
alte anti frote dea erhina ƿarun •
dat hiltibrant hætti min fater • ih heittu hadubrant •
forn her ostar gihueit floh her otachres nid
hina miti theotrihhe enti sinero degano filu •
her fur laet in lante luttila sitten
prut in bure barn unƿahsan
arbeo laosa • her raet ostar hina
des sid detrihhe darba gistuontum
fateres mines • dat uuas so friuntlaos man
her ƿas otachre ummet tirri
degano dechisto unti deotrichhe
darba gistontun her ƿas eo folches at ente imo ƿas eo peheta ti leop •
chud uuas her … • chonnem mannum
ni ƿaniu ih iu lib habbe … •
ƿettu irmingot quad ¶ hiltibraht obana ab heuane
dat du neo dana halt mit sus sippan man
dinc ni gileitos … •
ƿant her do ar arme ƿuntane bauga
cheisuringu gitan • so imo se der chuning gap
huneo truhtin • dat ih dir it nu bi huldi gibu •
hadubrant gimahalta hiltibrantes sunu •
mit geru scal man geba infahan
ort ƿidar orte … •
du bist dir alter hun ummet spaher
spenis mih mit dinem ƿuortun ƿili mih dinu speru ƿerpan •
pist also gialtet man so du eƿin inƿit fortos •
dat sagetun mi seolidante
ƿestar ubar ƿentilseo dat inan ƿic furnam •
tot ist hiltibrant heribrantes suno •
hiltibrant gimahalta heribrantes suno •
ƿela gisihu ih in dinem hrustim
dat du habes heme herron goten
dat du noh bi desemo riche reccheo ni ƿurti •
ƿelaga nu ƿaltant got quad hiltibrant ƿeƿurt skihit •
ih ƿallota sumaro enti ƿintro sehstic ur lante •
dar man mih eo scerita in folc sceotantero
so man mir at burc enigeru • banun ni gifasta •
nu scal mih suasat chind • suertu hauƿan
breton mit sinu billiu eddo ih imo ti banin ƿerdan •
doh maht du nu aodlihho ibu dir din ellen taoc •
in sus heremo man hrusti giƿinnan
rauba bihrahanen • ibu du dar enic reht habes •
der si doh nu argosto quad hiltibrant ostar liuto
der dir nu ƿiges ƿarne nu dih es so ƿel lustit •
gudea gimeinun niuse de motti •
ƿerdar sih dero hiutu hregilo rumen muotti •
erdo desero brunnono bedero uualtan •
do lettun se ærist asckim scritan
scarpen scurim dat in dem sciltim stont •
do stoptun to samane staim bort chludun •
heƿun harmlicco huitte scilti •
unti imo iro lintun luttilo ƿurtun •
giƿigan miti ƿabnum